Bekende sterf skielik
Die bekende mnr. Eddie Collins (71) is Donderdagoggend 17 Desember skielik oorlede.
Sy vrou, Deneys, sê hy staan gewoonlik vroeg op om sy pille te drink en het sy opgemerk hy sit op die kant van die bed. Die volgende oomblik het hy net omgeval en van die bed afgeval.
Hy is kort na die paramedici se aankoms dood verklaar. “Eddie se pille was nog in sy hand vasgeklem toe die paramedici daar kom.”
Me. Collins sê haar man het sowat vier jaar gelede ernstige longontsteking opgedoen. “Hy het van toe af net agteruit gegaan.”
Mnr. Collins was jare gelede ‘n bankbestuurder by die destydse Trustbank toe hulle in Bothaville gebly het.
Later het hy as vleisspekuleerder bekend geword op Middelburg. Mnr. Collins het, totdat hy vier jaar gelede siek geword het, vir sy dogter, Anelda (‘n prokureur) derdeparty eise hanteer.
Die Collins egpaar was byna 48 jaar getroud. “Dit is ‘n troos om te dink dat ons saam was tot hierdie dag toe.”
Me. Collins het haar dogters, Anelda en Erichua, bedank vir hul ondersteuning in hierdie moeilike tyd. “My kinders is só goed vir my. Ek weet nie wat ek gedoen het om dit te verdien nie.
Sy het haar man beskryf as iemand met ‘n “mooi geaardheid. Die mense was lief vir hom.”
Mnr. Collins word oorleef deur me. Collins, dogters Anelda en Erichua, skoonseun, Wynand, kleinkinders Deneys en JF en suster Moira.
• Die begrafnis was Maandag uit die Witkerk.
