Tweede slagoffer uitgeken
Die tweede slagoffer van verlede Woensdag se ongeluk by Wonderfontein op die N4 is ook uitgeken.
Ian Swarts en Stephan Louw was beide 40 jaar oud met hul afsterwe. Beide van hulle was pa’s van klein kindertjies.
Mnr. Swarts, wat vir Business Engineering gewerk het, was van Garsfontein afkomstig en op pad Nelspuit toe vir werk, terwyl mnr. Louw, wat vir Multotech Manufacturing gewerk het, in eMalahleni gewoon het en op pad was na Nkomati myn.
Beide het gesterf nadat ’n trok met ’n vrag steenkool uitgeswaai het vir ’n Checkers trok, wat besig was om van die hoofweg na die Carolinapad af te draai. Die trok het oor die aankomende baan gejaag en met die Toyota bakkie en Volkswagen kar waarin mnre. Louw en Swarts gery het gebots.
’n Ooggetuie op die toneel sê dat mnr. Swarts opslag dood is terwyl mnr. Louw nog vir ’n kort rukkie asem gehaal het.
Mnr. Swarts se begrafnis sal Donderdag om 12:00 uit die NG Moreletta gemeente in Pretoria plaasvind. Mnr. Louw se begrafnis vind Woensdag om 10:00 in eMalahleni uit die Witbank Herlewing Sentrum plaas.
