Piet se sitplek leeg
Middelburg se kuierplekke rou steeds oor 'n geliefde "regular" se afsterwe.
‘n Kers is by mnr. Piet Miller (51), se gunsteling sitplek in Tacers aangesteek, ter nagedagtenis aan hom, na hy Maandag dood agter sy lessenaar by Columbus aangetref is deur ‘n kollega.
Columbus paramedici het kort nadat hy om 05:00 gevind is, vergeefs probeer om Piet by te bring na ‘n massiewe hartaanval aan diens.
Die ambulansdienste is ook ontbied, en tesame met die nooddienste van Columbus, is daar onverpoosd probeer om sy hart weer aan die gang te kry.
Piet het altyd ‘n oop hand gehad, en almal wat na werk ‘n lafenissie gaan soek het, was seker dat hulle hom iewers sou raakloop.
Hy het homself op sy eie Facebook-blad, in ‘n onderskrif by ‘n foto van hom geskryf, “dis ek, altyd met ‘n smile,”.
Noudat hy weg is, sal hy nooit weet hoe waar sy woorde was nie.
Hy het daagliks by sy pa en ma, Pieter en Elsa Miller van Kosmospark gaan aanklop vir ‘n kuiertjie.
“Hulle was so gelukkig om so nabye band met hom te hê,” het Piet se sus Ria Kies, die week aan die Observer gesê.
“Ons sal hom altyd onthou as ‘n plaatjie en grapjas, met die ewige glimlag, dis hoe hy homself gesien het, en dis hoe almal hom geken het,” het Ria bedroef genoem.
Columbus het na sy afsterwe ‘n memo uitgestuur wat lees: “Dit is met groot hartseer dat ons afskeid neem van Piet Miller. Piet het sy loopbaan by Columbus begin in April 1989. Hy was ‘n betroubare, toegewyde spanlid, en dit was ‘n plesier om saam hom te werk. Sy skielike dood laat ‘n groot leemte. Hy sal gemis word, maar in ons harte wees”.
Hy laat sy ouers, suster, en twee kinders, Tertius en Lu-Zanne, in die Kaap agter.
Sy roudiens word komende Woensdag, om 11:00 uit die AP Kerk in Kanonkop, gehou.
