Video: Kar brand – mense help nie, neem videos
Toe ’n kar langs die pad in Aerorand aan die brand slaan, het niemand probeer help nie. Almal het na hul selfone gegryp.
’n Volvo nutswa het Woensdagmiddag langs in Soutpansbergstraat langs die Athlonedam uitgebrand.
Johan Bonthuyzen sê dat hy rook by die voorste paneel sien uitkom het. Hy het dadelik gestop en probeer kyk wat aangaan maar dit was reeds te laat omdat daar klaar vlamme was.
“Daar was so baie mense, ek het gehoop dat iemand met ’n mynbakkie aangehardloop gaan kom met ’n brandblusser. Maar almal het aangehardloop gekom met hul selfone om foto’s en video’s te neem.”
Die brandweer was blitsvinnig op die toneel, maar die motor het so vinnig uitgebrand dat dit reeds heeltemal deur vlamme verswelg was toe hulle daar opdaag.
Die voertuig het binne ’n kwessie van minute uitgebrand.
“Dit was ’n fantastiese kar,” sê mnr. Bonthuyzen. Hy vermoed die brand is deur ’n kortsluiting veroorsaak.
Niemand is tydens die voorval beseer nie.
