{"id":58301,"date":"2016-10-19T11:13:00","date_gmt":"2016-10-19T09:13:00","guid":{"rendered":"http:\/\/echonews.sites.caxton.co.za\/58301\/een-nag-en-n-bietjie\/"},"modified":"2016-10-20T13:38:10","modified_gmt":"2016-10-20T11:38:10","slug":"een-nag-en-n-bietjie","status":"publish","type":"post","link":"https:\/\/develop.citizen.co.za\/middelburg-observer\/news-headlines\/2016\/10\/19\/een-nag-en-n-bietjie\/","title":{"rendered":"Hester praat oor boek op Kw\u00eala – \u2018Een nag en \u2019n bietjie\u2019"},"content":{"rendered":"

Die boek laat \u2019n mens hoendervel kry as jy weer die gebeure van die nag van die aanval en ontvoering op hulle beleef. Saam met haar die vlietende gedagtes uit haar kinder- en jongvroudae ervaar as sy dink die dood is naby.<\/p>\n

Hierdie gedeeltes word begin in die eerste helfte van die boek met: \u201cEen nag….\u201d<\/p>\n

En dan uiteindelik die tweede helfte, \u201cEn \u2019n bietjie\u201d die lewe daarna, die invloed op haar en haar man, Johan se lewens, en die aanvaarding en saamleef van die trauma, wat vir altyd hul lewens verander het.<\/p>\n

Hester is ietwat oorweldig oor al die aandag wat sy tans kry en lag lekker as sy s\u00ea dat Middelburgers en Groblersdallers vanaand eers moet kyk na haar kouse voordat hulle na die verhaal van die boek luister.<\/p>\n

\u201cKyk asseblief vir my rooi kouse! Ek is die hele Groblersdal deur om r\u00f3\u00f3i kouse te kry om myself moed te gee!\u201d<\/p>\n

Hester s\u00ea sy het die boek geskryf oor hoe sy gevoel het. \u201cMy man is eintlik die skrywer. Ek is nie \u2019n tegniese skrywer nie. Ek het ook nie probeer tegnies skryf nie. Ek het uit my hart uit geskryf!\u201d<\/p>\n

Sy is ook gemaklik daarmee dat sy litir\u00eare kritiek oor haar boek kan kry.<\/p>\n

\u201cMy dogter het dit so mooi beskryf. In musiek wanneer die toonaard van \u2019n lied verander, moet jy net asemhaal en in die volgende modus ingaan. En dit is presies wat hier gebeur het.\u201d<\/p>\n

Hester en haar man, adv. Johan Kruger, was die nag van 4 Januarie 2009 die eerste slagoffers van \u2019n reeks aanvalle en later ook \u2019n moord op plase op die Loskopdampad.<\/p>\n

Die egpaar is op hul plaas oorval, aangerand en ontvoer. \u2019n Paar kilometer buite Middelburg het hulle haar en die een aanvaller alleen langs die pad afgelaai en is die ander met haar man in dorp toe om geld uit sy rekening te trek.<\/p>\n

Sy het later die donker in gevlug en ure later eers langs die pad hulp gekry. Haar man is deur die rowers in Limpopo afgelaai. Beide het gedink hul huweliksmaats is dood en dit was later \u2019n blye weersiens.<\/p>\n

Oral in die boek is daar terugflitse na haar verlede soos sy dit kon onthou. \u201cDit was hoofsaaklik die waarheid, maar soms las \u2019n mens ook maar \u2019n stertjie aan.\u201d<\/p>\n

Hester stel dit duidelik dat die boek nie \u201c\u2019n resepteboek sal wees hoe om trauma te hanteer nie, dit is my persoonlike manier van doen. Elke slagoffer hanteer en voel anders. Ek deel egter in hul pyn. Ek gee erkenning aan hulle in my boek.\u201d<\/p>\n

Sy vertel dat sy \u2019n boek gegee het vir een van die slagoffers, oud-Middelburg Observer joernalis, Magda van Maarleveld.<\/p>\n

\u201cOns het daaroor gepraat en ek het besef elkeen het \u2019n eiesoortige ervaring van trauma, wat niemand \u2019n antwoord voor kan gee oor hoe om dit te hanteer nie.\u201d<\/p>\n

Hester s\u00ea haar boek \u201cgaan oor menslikheid. Ek praat nie misdaad goed nie. Ek s\u00ea tog in die boek dat ek gejubel het toe ek besef het die een is dood. As almal egter haat, sal alles in duie stort. Boewery kan nie goedgekeur word nie, maar daar moet aandag gegee word aan die onderliggende faktore soos onderrig, gesindheid, ekonomiese toestande. Alles dra onderliggend by tot geweld en dat mense aggressief word. Ek is die laaste persoon wat kan oordeel.\u201d<\/p>\n

Maar hoekom \u2019n boek? Sy s\u00ea dat verskeie faktore haar oortuig het om die pen op te neem.<\/p>\n

Dit het begin by die dag toe sy een middag oor middagete vir \u2019n vriendin vertel het van die gebeure. \u201cSy het ges\u00ea, hoekom skryf jy nie \u2019n boek nie.\u201d<\/p>\n

Die boek was vir haar deel van die herstelproses. \u201c\u2019n Mens se gedagtes bly rondrol rondom die gebeurtenis. Ek wou afstand van my emosies kry om objektief daarna te begin kyk.\u201d<\/p>\n

Die afstand is vergestald in die feit dat sy nie haar en haar man (in die eerste persoon) se name gebruik het nie. Al die ander slagoffers se name is egter gebruik en die gebeure ook feitelik weergegee.<\/p>\n

\u201cDit was egter nie net dat ek alles kon orden en uiteen kon sit nie. Dit is ook geskryf vir my kinders, want dit was net so traumaties vir hulle. Hiermee wou ek net vir hulle s\u00ea: ek is okey.\u201d<\/p>\n

Die boodskap wat sy uitdra, is dat pyn en misdaad universeel is in Suid-Afrika en dat nie net sy uitgesonder moet word as slagoffer nie. Sy wil egter vir elkeen daarbuite wat deur di\u00e9 pyn gaan, hierdie spesiale boodskap gee: \u201cDaar is altyd \u2019n pad vorentoe, maak nie saak w\u00e1t die omstandighede is nie!\u201d<\/p>\n

\u2022 Die uitsending is vanaand om 20:30 op Kyknet, DSTv-kanaal 144.<\/p>\n

\u2022 Nog \u2019n berig verskyn in die Vrydag uitgawe van die Middelburg Observer.<\/p>\n