{"id":51289,"date":"2016-06-23T13:52:00","date_gmt":"2016-06-23T11:52:00","guid":{"rendered":"http:\/\/echonews.sites.caxton.co.za\/51289\/dokter-by-hospitaal-aangerand\/"},"modified":"2016-06-27T14:27:04","modified_gmt":"2016-06-27T12:27:04","slug":"dokter-by-hospitaal-aangerand","status":"publish","type":"post","link":"https:\/\/develop.citizen.co.za\/middelburg-observer\/news-headlines\/2016\/06\/23\/dokter-by-hospitaal-aangerand\/","title":{"rendered":"Video: Dokter by hospitaal aangerand"},"content":{"rendered":"

Dr. Adele Visser het krap- en rooi merke in haar nek waar die sekuriteitswag haar aan die keel beetgekry en gewurg het.<\/p>\n

\u2019n www.mobserver.co.za joernalis was so pas by die groot parkering van die hospitaal, waar dr. Visser en haar broer, Tobie van Loggerenberg, hulle ontmoet het.<\/p>\n

Hulle kon nie huis toe gaan nie, aangesien die sekuriteitswagte beslag gel\u00ea het op hul selfone.<\/p>\n

Dr. Visser s\u00ea haar huishulp het vir haar gevra om tydens besoektyd te gaan kyk hoe dit met \u2019n familielid gaan wat al vir twee weke daar l\u00ea na \u2019n motorongeluk.<\/p>\n

As guns vir die familie, het dr. Visser die pasi\u00ebnt gaan besoek en wou net in die l\u00eaer kyk om haarself te vergewis van die pasi\u00ebnt se toestand en watter behandeling die pasi\u00ebnt kry.<\/p>\n

\u2019n Suster het ingestorm en die l\u00eaer by haar gegryp en ges\u00ea dat sy nie daarna mag kyk nie.<\/p>\n

Sy het die suster gevra wat haar naam is, maar sy het geweier om haar naam vir haar te gee.<\/p>\n

Dr. Visser het daarop vir haar ges\u00ea die enigste manier hoe sy kan uitvind wie sy is, as sy \u2019n foto van haar neem en dit vir die supervisor wys.<\/p>\n

Die suster het uitgestorm en dr. Visser het agter haar aangeloop om met haar te probeer praat, maar sy het omgevlieg en haar met die l\u00eaer geslaan.<\/p>\n

Dr. Visser is na die ander personeel in die saal en vir hulle ges\u00ea dat die suster haar aangerand het.<\/p>\n

Hulle het haar beskuldig dat sy foto\u2019s geneem het, waarop sy haar foon uitgehaal en vir hulle ges\u00ea het dat sy ni\u00e9 foto\u2019s geneem het nie.<\/p>\n

Sy het selfs op haar foon vir hulle al haar foto\u2019s gewys.<\/p>\n

\"Dr.<\/a>
Dr. Adele Visser (patoloog) is pas deur \u2019n suster en \u2019n sekuriteitswag van die Middelburg Hospitaal aangerand. Die suster het haar met \u2019n l\u00eaer geslaan en die sekuriteitswag het haar gewurg.<\/figcaption><\/figure>\n

Op hierdie stadium het \u2019n sekuriteitswag opgedaag en sy het vir hom ook die foto\u2019s gewys.<\/p>\n

Hy het egter die foon by haar gegryp. Dr. Visser het hom aan die arm gevat en gevra vir haar foon.<\/p>\n

Die sekuriteitswag het die skraal vroutjie aan die nek, weerskante van haar gorrel, beetgekry en begin wurg.<\/p>\n

Sy het gegil dat die personeel die polisie moet bel, maar hulle het geweier.<\/p>\n

Mnr. Van Loggerenberg het ook intussen na sy suster gaan soek, waarop die sekuriteitswagte ook sy selfoon afgevat het.<\/p>\n

\u201cEen het my vorentoe gestamp teen die ander een vas, waarop die ander een my weer van sy kant af teruggestamp het. Ek het net my hande in die lug gegooi en gevra wat wil hulle h\u00ea ek moet doen.\u201d<\/p>\n

\u2022 Mnr. Van Loggerenberg het die www.mobserver.co.za joernalis se foon gebruik om \u2019n vriend te bel. Die vriend het met die hulp van die \u201cFind my phone\u201d App, gesien dat die fone by die De Kock gebou in die dorp is!<\/p>\n